මහනුවර  ඇසළ පෙරහැර සමයේ පෙරහැර නැරඹීමට  නුවර පුරවරයට පැමිණි  මහජනතාව විසින් මහනුවර නගරයේ  දමා ගොස් තිබූ විවිධ කසළ අපද්‍රව්‍ය පොලීතීන් ප්ලාස්ටික් බෝතල් ඇතුළු කසළ  ප්‍රමාණය කිලෝ ග්‍රෑම්  323,320ක් බව මහනුවර මහ නගර සභාවේ නාගරික කොමසාරිස්  ඉන්දිකා  කුමාරි අබේසිංහ  මහත්මිය පවසයි,

අගෝස්තු මස මස  15  වන දින සිට අගෝස්තු මස  29 දින දක්වා නගර සභාවේ කසළ කළමණාකරණ අංශයේ සියලුම  කාර්ය මණ්ඩලය විසින්  මෙම කසළ  ප්‍රමාණය  මහත් වෙහෙසක්  දරා  ඉවත් කර තිබේ.

මහනුවර මහ නගර සභාවේ සෞඛ්‍ය අංශයේ  පවිත්‍රතා  ඒකකයේ සේවක සේවිකාවන්  දිවා රාත්‍රී  වෙහෙස වී  මනා කැපවීමෙන්  නගරයේ කැළි කසළ ඉවත් කර නගරය පිරිසිදු කිරීමට වෙහෙසුණු බවද  ,නාගරික කොමසාරිස් වරිය  පැවසුවාය,

මහජනයා  විසින්  පෙරහැර බැලීමට එන විට රැගෙන ආ සියලු පොලීතීන් ද්‍රව්‍ය ආහාර කොටස්, ඉඳුල්, අලි ඇතුන් විසින්  කා දමා ඉතිරි කරන ලද කිතුල් කොටවල  කොටස්, පන්දම්දල්වා ඉවත ලන අඟුරු  සහ වෙනත් කසළ විශාල ප්‍රමාණයක් නගරය පුරා දමා ගොස් තිබියදී නගර සභා සේවකයන්  විසිනි  ඉවත්  කර  තිබේ.

මහනුවර පුරපති චන්ද්‍රසිරි  විජේනායක,නියෝජ්‍ය පුරපති කපිල කුමාර ගලපිටගේ යන මහත්වරු ඇතුලු නගර සභාවේ  කාර්ය මණ්ඩලය පෙරහැර සමයේ නගරයේ පවිත්‍රතාවය  පරිසරය ආරක්ෂා කර ගැනීම සහ නගරයට පැමිණි ජනතාවට අත්‍යාවශ්‍ය  පොදු පහසුකම් සපයා දීමට පියවර  ගත් බවද ,නාගරික කොමසාරිස් වරිය  සඳහන් කළාය.

ජේ.ඒ.එල් ජයසිංහ