මෙවර සිරිකත Online කතාව with Ash සමඟ හරි ආදරණීය කතාබහක නිරත වන්නේ ප්‍රවීණ රංගන ශිල්පියෙක් මෙන් ම නර්තන ශිල්පියෙක් වන සුරාජ් මාපා. දෙමව්පිය ආදරය පිළිබඳ ඔහුත් සමඟ කෙරුණු සුහද කතාබහයි මේ. 
 

ඔබ කාන්තාව දකින්නේ කොහොම ද ? 

ශක්තියක්. ශක්ති කියන්නේ කාන්තාවට. එයාගෙන් තමයි ශක්තිය ආරම්භ වෙන්නෙ. පුංචි ම කාලෙ අම්ම තමා අපට ශක්තිය ලබා දෙන්නේ. අපි ලොකු වුණාට පස්සේ, විවාහ වුණාට පස්සේ බිරිඳ අපේ ශක්තිය වෙනවා. ඒ නිසා කාන්තාව කියන්නෙ ම ශක්තියක්.

ඔබට ඔබේ මව දැනෙන්නෙ කොහොම ද?

මගේ අම්මා තමා මගේ ශක්තිය. පොඩි කාලේ අම්මා තමා මාව හැම දෙයකට ම යවන්නේ. හැම දෙයකට ම එයා තමා මට ශක්තිය දුන්නේ. මට මගේ අම්ම එක්ක තරහා වෙලා ඉන්න බැහැ. මගේ අම්මයි, තාත්තයි තරම් කෙනෙක් මගේ ජීවිතයේ නැහැ. මම අද මෙහෙම ඉන්නේ ඒ දෙන්න නිසා. දැන් නම් ඒ දෙන්න ම ජීවතුන් අතර නැහැ. ඒ දෙන්නා එක්ක එකට ගෙවපු ජීවිතේ අපි කොහොම ද ආයෙ ගන්නේ. මම නම් ඒ දෙන්නා එක්ක ජීවිතේ උපරිමයෙන් ම වින්දා. 

මම මේ ළඟක දී වැඩිහිටි නිවාසෙකට ගියා. ඒකේ ඉන්න ගොඩක් අයට සල්ලි උපරිමෙන් ම තියෙනවා. නමුත් ඒ අයගේ ජීවිතයේ ලොකු හිස්තැනක් මම දැක්කා. ඒ අයට ගොඩක් වටින්නේ ඒ අයත් එක්ක අපි කරන කතාබහ. අපේ ඕනෑ ම දෙයක් කියන්න පුළුවන් එයාලට. අපිට විශ්වාස කරන්න පුළුවන් හොඳම දෙන්නා තමයි අපේ අම්මයි, තාත්තයි. හිරගෙදරට හරි අවසානෙ එන්නේ අපෙ අම්මයි, තාත්තයි විතරයි.

උපුටා ගැනීම - සිරිකත Online කතාව with Ash 

සටහන - සහශ්‍රිකා දයානන්ද