ඇමෙරිකානු ජනාධිපති ඩොනල්ඩ් ට්‍රම්ප්ගේ 80 වැනි ජන්ම දිනය සහ ඇමෙරිකාවේ 250 වන නිදහස් සංවත්සරය සැමරීම නිමිත්තෙන් සුවිශේෂී මිශ්‍ර සටන් කලා (MMA) තරගයක් පසුගිය 14 වැනිදා රාත්‍රියේ ධවල මන්දිර ගෙවත්තේදී උත්කර්ෂවත් අන්දමින් පැවැත්විණි.

ඇමෙරිකානු ඉතිහාසයේ ධවල මන්දිර පරිශ්‍රයක මෙවැනි වෘත්තීය ක්‍රීඩා තරගයක් පැවැත්වුණු ප්‍රථම අවස්ථාව මෙය වීම විශේෂත්වයකි.

'යූඑෆ්සී ෆ්‍රීඩම් 250' (UFC Freedom 250)

ජනාධිපති ට්‍රම්ප්ගේ සුවිශේෂී සංකල්පයකට අනුව මෙම තරගාවලිය 'යූඑෆ්සී ෆ්‍රීඩම් 250' (UFC Freedom 250) යනුවෙන් නම් කර තිබූ අතර, එය ලෝක ප්‍රකට මිශ්‍ර සටන් කලා සංවිධානයක් වන *යූඑෆ්සී (UFC)* ආයතනය විසින් සංවිධානය කරනු ලැබ තිබුණි.

UFC ප්‍රධානී ඩේනා වයිට්, ජනාධිපති ට්‍රම්ප්ගේ සමීපතම මිතුරකු වන බැවින් ධවල මන්දිර ගෙවත්තේ මෙවැනි දැවැන්ත සටන් වටරවුමක් (Octagon) සහ වේදිකාවක් ඉදිකර තරගය පැවැත්වීමට කිසිදු බාධාවක් එල්ල වී නොමැත.

මෙම ඓතිහාසික රාත්‍රියේ ප්‍රධාන සටන පැවැත්වුණේ ලොව ප්‍රමුඛ පෙළේ දක්ෂ සටන්කරුවන් දෙදෙනෙකු වන *ජස්ටින් ගේජි (Justin Gaethje) සහ ඉලියා තොපූරියා (Ilia Topuria)* අතරය. ප්‍රේක්ෂකයින් කුල්මත් කළ තියුණු සටනකින් පසු, එහි අවසන් ජයග්‍රහණය තමන් සතු කර ගැනීමට ජස්ටින් ගේජි සමත් විය.

ධවල මන්දිරයේ පැවැත්වුණු මෙම අති විශේෂ සටන නැරඹීම සඳහා 4,000 කට අධික ආරාධිත අමුත්තන් පිරිසක් එක්ව සිටියහ. ඒ අතර කැපී පෙනෙන චරිත කිහිපයක් ලෙස ජනාධිපති ඩොනල්ඩ් ට්‍රම්ප් සහ මෙලනියා ට්‍රම්ප් මහත්මිය ඇමෙරිකානු කැබිනට් මණ්ඩලයේ ප්‍රමුඛ සාමාජිකයන 'මෙටා' (Meta) සමාගමේ ප්‍රධානී *මාර්ක් සකර්බර්ග්* ඇතුළු ලොව ප්‍රකට ව්‍යාපාරිකයන් රැසක් සහභාගී විය.

 සාම්ප්‍රදායික ධවල මන්දිර උත්සව රටාවෙන් බැහැරව, ක්‍රීඩාව සහ දේශපාලනය මුසු කරමින් පැවැත්වුණු මෙම UFC සටන, ඇමෙරිකානු ඉතිහාසයේ නොමැකෙන මතකයක් ඉතිරි කළ රාත්‍රියක් බවට පත්ව තිබේ.

ලංකාදීප පුවත්පත ඇසුරෙන්