ශ්‍රී ලංකා පාසල් රග්බි සංගමය විසින් සංවිධානය කරනු ලබන අන්තර් පාඨශාලීය ලීග් ශූරතා රග්බි තරගාවලියේ කුසලාන සුපිරි 02 වටයේ පළමු සතිය නිමාවන විට, තමන් සතු අපරාජිත ගෞරවය රැක ගනිමින් ඉදිරියටම යාමට මහනුවර ත්‍රිත්ව විද්‍යාලය සමත් වී ඇත. ජේන් සෙනෙවිරත්න මහතා විසින් වාර්තා කර ඇති පරිදි, පසුගිය සතියේ පැවැති තරග රැසකදීම පාසල් රග්බි පිටියේ කැපී පෙනෙන පෙරළි කිහිපයක්ම සිදු විය.

හැව්ලොක්ස් ක්‍රීඩා පිටියේදී පැවැති *ත්‍රිත්ව විද්‍යාලය සහ වෙස්ලි විද්‍යාලය* අතර තරගයෙන් ලකුණු 43-10 ක් වැනි දැවැන්ත පරතරයක් තබා ගනිමින් පහසු ජයක් වාර්තා කිරීමට ත්‍රිත්ව සිංහයෝ සමත් වූහ. පළමු වටය අවසාන වන විට අපරාජිතව සුපිරි 02 වටයට පැමිණි ඔවුන්, එම අපරාජිත නාමය තවදුරටත් ඉදිරියටම රැගෙන යාමට මෙහිදී උපරිම දක්ෂතා දැක්වීය.

 පීතරයන්ගේ අපරාජිත ගමන සහිරාව නවත්වයි

පළමු වටයේදී අපරාජිතව පැමිණි කොළඹ ශාන්ත පීතර විද්‍යාලයේ එම ජයග්‍රාහී ගමන නිමා කිරීමට මෙවර තරගාවලියේ "කළු අශ්වයන්" ලෙස හඳුන්වන සහිරා විද්‍යාලය සමත් විය. ඉතාමත් උණුසුම් මුහුණුවරක් ගත් මෙම තරගයෙන් ලකුණු 38-34 ක් ලෙස තියුණු ජයක් ලබමින්, පීතරයන්ගේ අපරාජිත ගමනට තිත තැබීමට සහිරා ක්‍රීඩකයෝ සමත් වූහ.

ඉසිපතනයෙන් රාජකීයයන්ට දරුණු පරාජයක්

මෙවර ලීග් තරගාවලියේ ඉතා සාර්ථක ප්‍රවේශයක් ලබාගෙන සිටින *ඉසිපතන විද්‍යාලය*, මෙතෙක් දරුණු පසුබැසීමකට ලක්ව සිටින රාජකීය විද්‍යාලය පරදා ලකුණු 31-12ක පහසු ජයක් වාර්තා කිරීමට සමත් විය.

 වාරියපොළ ශ්‍රී සුමංගල විද්‍යාලයට දැඩි ප්‍රහාරයක්

මෙවර තරගාවලියේ කුසලාන වටයේ ඉතා සාර්ථක ගමනක් යමින් සිටි වාරියපොළ ශ්‍රී සුමංගල විද්‍යාලය, *ආනන්ද විද්‍යාලය* හමුවේ ලකුණු 31-12 ක දරුණු පරාජයකට ලක්වීම පසුගිය සතියේ සිදුවූ තවත් විශේෂ සිදුවීමකි.

 තර්ස්ටන් විද්‍යාලයට තියුණු ජයක්

කටුගස්තොට නිත්තවෙල ක්‍රීඩාංගණයේදී පැවැති අනෙක් තරගයෙන් මහනුවර ශාන්ත අන්තෝනි විද්‍යාලය සහ කොළඹ තර්ස්ටන් විද්‍යාලය එකිනෙකා හමුවිය. එහිදී ලකුණු 14-12 ක් ලෙස ඉතාමත් තියුණු ජයක් තමන් සතු කරගැනීමට  තර්ස්ටන් විද්‍යාලය සමත් විය.

මෙවර පාසල් රග්බි ලීග් තරගාවලිය ඉතාමත් තරගකාරී මුහුණුවරක් ගෙන ඇති අතර, මහනුවර ත්‍රිත්ව විද්‍යාලය සිය අපරාජිත බලය තහවුරු කරගනිමින් පෙරමුණේ පසුවේ.

සටහන අංජු බණ්ඩාර 
ලංකාදීප පුවත්පත ඇසුරෙන්