ලෝක මව්වරුන්ගේ  දිනයට සමගාමීව පසුගිය මැයි 11වන  දිනට යෙදී තිබුණ ලෝක මව්වරුන්ගෙ දිනය සිහිගන්වමින් , අනූෂ සංජීව එදිරිමුණි  විසින් අධ්‍යක්ෂණය කරනු ලැබූ " මදර් ලංකා  " චිත්‍රපටයේ විශේෂ දර්ශනයක් , අම්මාවරුන් හා මාධ්‍යවේදීන් , ආරාධිතයින්  ඇතුළු විශාල පිරිසක් මධ්‍යයේ පැවැත්විණ. අප මෙලොව ජීවමානව දුටු ගෙදර බුදුන් අම්මා ලෙස ලොවම හඳුන්වන  ආදරණීය අම්මා කෙනෙකුගේ හදවතේ තම දරුවා වෙනුවෙන් උපදින දාරක ප්‍රේමයත් , බැඳීම හා සෙනෙහසත් කුමන අවහිර බාධක පැමිණියද නොබිඳී නොසැලී තම ලෙයින් උපන්  දරුවාගේ  යහපත වෙනුවෙන් දහසක් දුක්  කම්කටොලු ඉවසා වදාළ  අම්මාවරුන් කොතෙකුත් ලෝකය පුරා ඇති වග නොරහසකි ? එවන් අම්මා කෙනෙකුගේ  දිරිය පිරි දිවියේ කඳුළු කතාවයි  " මදර් ලංකා " සිනමා කව්‍යය.

  ශාලු නම් ඇය තම මව් බිම රනින් සැරසූ අභිමානවත් ජාත්‍යන්තර  තලයේ ක්‍රීඩිකාවක්ව සිටියදී , සියළු සිහින එක් නිමේෂයක් තුළ දියව යන්නේ හදිසි ගැබ් ගැනීමක් හේතුවෙනි.සියල්ල අ'තැර හුදකලා සටනක නිරතවන ශාලු ගේ එකම අරමුණ තම දියණිය එමී ව ඉහල තලයකට ඔසවා තැබීමයි. පියා කවුරුද නොදත් එමීටත් , ශාලුටත් සහයට එන්නේ   , තවත් අසරණ වු  හා සමාජ ගැරහුමට ලක්වූ ගැහැණියක් වන සත්‍යායි. දක්ෂ බැඩ්මින්ටන් සූරියක් වන එමී , ලෝක ශූරතාවය දක්වා  අනේකවිධ අවහිරතා මැද රැගෙන යන දිරිය මවක වු ශාලු ගේ අනුවේදනීය කඳුළු කතාව " මදර් ලංකා " ලෙසින් ප්‍රේක්ෂකයා හමුවට පැමිණෙයි.

මෙහි ශාලු ලෙසින් තරින්දි ප්‍රනාන්දු , එමී ලෙසින් සිනමාවට හඳුන්වාදෙන සෙනුකි දිශල්‍යා ,සහ සත්‍යා ලෙසින් ධනංජය සිරිවර්ධන විශිෂ්ඨ රංගනයක යෙදෙන අතර, බිමල් ජයකොඩි , සනත් ගුණතිලක ,දිල්හානි අශෝකමාලා , හර්ෂිකා රත්නායක , ධර්මප්‍රිය ඩයස් , කළණ ගුණසේකර ,චතුරංග කොඩිතුවක්කු ,හේෂානි ලියදිපිට ,මාදිනි මල්වත්ත , සරත් කොතලාවල ,කුසුම් පෙරේරා ඇතුළු ප්‍රවීණයන්‍ රැසක් රංගනයෙන් දායකව ඇත . තිර රචනයෙන් ක්‍රිෂාන්ති කුලසුරිය, කැමරාකරණයෙන් රංගන එස්. බණ්ඩාර ,අංග රචනයෙන් නයන උදිත් , කලා අධ්‍යක්ෂණයෙන් විහඟ දෙනුවන් , සහය අධ්‍යක්ෂණයෙන් නිරෝශන් එදිරිමාන්න , සංගීත අධ්‍යක්ෂණයෙන් එරංග ජයවර්ධන ,සමූහ  අධ්‍යක්ෂණයෙන් ලසන්ත ප්‍රැන්සිස් හා නිෂ්පාදන කළමනාකරණයෙන් ලක්රුවන් ලොකුහෙට්ටිආරච්චි  එක්වී ඇති " මදර් ලංකා "  ඉෂාන් පෙරේරාගේ නිෂ්පාදනයකි .

 

සටහන
ඇන්ටන් .ජේ. ප්‍රනාන්දු