සම්මාන උළෙලයන් රැසක් නියෝජනය කරමින් සම්මාන  රැසකට හිමිකම් කියූ  මෝට බයිසිකල් " සමගින්  " සිහින නෙළුම් මල් " සිනමාවට තිළිණ කල යොවුන් නිර්මාණවේදී ශමීර නාඔටුන්න තිර රචනය සහ ගේය පද  ලියමින් අධ්‍යක්ෂණය කරන නවතම  නිර්මාණය " වයිෆ්" සිනමා පටයේ වැඩ කටයුතු පසුගිය දා ආරම්භ විය .  තරුණ විවාහක යුවලක් වන මාධව සහ නිර්මලාගේ ජීවන අරගලයත් , දරුවෙකු පිළිබඳව ඔවුන්ගේ  සිහිනයත්  අතර දෝලනය වන  හා ප්‍රධාන රැකියාවට අමතරව අතිරේක ආදායම් මාර්ගයක් සොයා යාමේදී මාධව මුහුණ දෙන අනපේක්ෂිත මෙන්ම සංකීර්ණ ගැටළු  හමුවේ , ඔවුන්ගේ පවුල් සංස්ථාව තුල ඇතිවන ව්‍යාකූලතා ද , නොබිදී නොගිලිහී  සිය ජීවිත , සෙනෙහස ආදරය පෙරදැරිව පවත්වාගෙන යාමට දරණ අධිෂ්ඨානශීලී  මෙන්ම අනුවේදනීය වූ  උත්සාහයේ ඉරණම් කතාවයි  වයිෆ් තුලින් විවරනය වන්නේ . මාධව හා නිර්මලා ලෙසින් හේමාල් රණසිංහ සමගින් උදාරී වර්ණකුලසූරිය රංගනයේ යෙදෙන මෙහි දිනෙත් ද සිල්වා , උමා අශේනි , සුලෝචනා වීරසිංහ , වීණා ජයකොඩි , ලක්ෂ්මන් මෙන්ඩිස් , ප්‍රියන්ත සෙනෙවිරත්න ,නෙතලී නානායක්කාර , ප්‍රියන්ත ලලිත් , ටීනා ශනෙල් , රොබෙකා දිල්රුක්ෂි ඇතුළු ප්‍රවීණ රංගන ශිල්පීන්  රැසක් මේ සඳහා දායකව ඇත.වරුණ අරඹගේ නිෂ්පාදනයක් වන " වයිෆ්" කැමරාකරණයෙන්  චින්තක සෝමකීර්ති , සංස්කරණයෙන් සිතුම් සමරජීව , අංග රචනයෙන් බුවණෙක රණවක , කලා අධ්‍යක්ෂණයෙන් ධම්මික හේවාදුවත්ත , ශබ්ද පරිපාලනයෙන් අරුණ ප්‍රියන්ත කළුආරච්චි , නිෂ්පාදන කළමනාකරණයෙන් හැරල්ඩ් කරුණාරත්න , වර්ණ සංයෝජනයෙන්  තිස්ස සුරේන්ද්‍ර , සංගීත අධ්‍යක්ෂණයෙන් චිත්‍රාල් සෝමපාල , ගීත ගායනයෙන් රෝහිත ජයලත් සහ චිත්‍රාල් සෝමපාල ද , සහය  අධ්‍යක්ෂණයෙන් ප්‍රසන්න නිරෝශන හා නිශ්චල ඡායාරූපකරණයෙන් අමල් රෝස් " වයිෆ් " සමගින් එක්වී සිටී.

ඇන්ටන් ජේ ප්‍රනාන්දු