උතුම් මනුෂ්‍යත්වය හා මිත්‍රත්වය පදනම් කර ගනිමින් ,  මෙරට පැවැති බිහිසුණු යුධ සමයේ සිදුවුන සත්‍ය කතා පුවතක් ඇසුරින් නිර්මාණය වූ  " සයනයිඩ් " චිත්‍රපටය , එකල උතුරේ මහ ඇමතිව සිටි හා ඊ.පී.ආර්.එල්.එෆ්. නායක වර්තරාජා පෙරුමාල් මහතා ඉලක්කකර ගනිමින්  සිදුකරන ලද එල්.ටී.ටී. ඝාතන සැලැස්ම සිනමාත්මකව ප්‍රේක්ෂකයා හමුවට මෙතුලින්  ගෙන එනු ලබයි.

මෙයට පෙර "අඟර දඟර " සහ " රේන්බෝ" වැනි සිනමා නිර්මාණ රිදී තිරයට එක්කල නලින් රාජපක්ෂ විසින් කතාව සහ තිර රචනය ලියමින් අධ්‍යක්ෂණය කල "සයනයිඩ් " චිත්‍රපටය  දෙසැම්බර් 26 වන දින සිට , එම්.පී.අයි. ප්‍රදර්ශන මණ්ඩලයේ බෙදාහැරීමක් ලෙස දිවයින පුරා සිනමා ශාලාවන් හී ප්‍රදර්ශනය ඇරඹීමට   නියමිතව ඇත. 

දකුණු ඉන්දීය කාර්මික හා නළු නිළියන්ගේ දායකත්වයෙන් නිමව ඇති මෙහි රංගනයෙන් රනීෂ් හේවගේ , රාජා ගනේෂන් , ජගත් ගලප්පත්ති , ගීතා කාන්ති ජයකොඩි , නිෂුලි නෙලිත්මා රාජපක්ෂ , ක්‍රිස්ටිනා බිටෝ , සඳුන් බණ්ඩාර , ඇලෙක්සි ප්‍රනාන්දු , අසංක දේවමිත්‍ර , රාජා බාලසූරිය , දුමිදු කන්නංගර සමගින් ප්‍රකාෂ් දසාරි, මහේන් කුමාර , මොහාන් පඩාලා , වීනූ මල්ලා වීදී , බාලු අකුලා ඇතුළු ශිල්පින් රැසක් එක්ව ඇත.සහය අධ්‍යක්ෂණයෙන් , දමිළ භාෂාව හා හඬ පුහුණුවෙන් රාජා ගනේෂන් , කැමරා අධ්‍යක්ෂණයෙන් විශ්වජිත් කරුණාරත්න සහ සායි ටෝනි , සංස්කරණයෙන් සහ දෙබස් පටිගතකිරිමෙන් අනුර බණ්ඩාර , වර්ණ සංයෝජනයෙන් ආනන්ද බණ්ඩාර , අංග රචනයෙන් තරංග රුක්මල් , කලා අධ්‍යක්ෂණයෙන් ඇලෙක්සි ප්‍රනාන්දු , පසුබිම් සංගීතයෙන් හා ගායනයෙන් දුල්ෂාන් සුලක්ෂණ , 7.1 ශබ්ද සංකලනයෙන් ශසික රුවන් මාරසිංහ , සටන් අධ්‍යක්ෂණයෙන් හා ගීත රචනයෙන් නලින් රාජපක්ෂ  එක්ව ඇති " සයනයිඩ් " මූන්ලයිට් චිත්‍රපට ඉදිරිපත් කිරීමක් ලෙසින් තිරගතවන අතර , මෙය සම්පූර්ණයෙන්ම ඉන්දියාවේ දර්ශනීය ස්ථානයන් හී දී රූපගත කිරීම් සිදුකර ඇත.

ඇන්ටන්.ජේ.ප්‍රනාන්දු