බඩ පිපුම, අජීර්ණය, බඩේ අපහසුතා හෝ අක්‍රමවත් මළපහ පිටවීම නිසා පීඩා විඳිනවාද? එසේ නම්, ඔබේ ආහාර ජීර්ණ පද්ධතියට වැඩි අවධානයක් යොමු කළ යුතු කාලය පැමිණ තිබේ. ආහාර ජීර්ණ පද්ධතිය යනු ආහාර බිඳ දැමීම, පෝෂ්‍ය පදාර්ථ අවශෝෂණය කිරීම සහ අපද්‍රව්‍ය ඉවත් කිරීම පමණක් නොව, සමස්ත සෞඛ්‍යයේම මූලික පදනමකි. එය නිසි ලෙස ක්‍රියාත්මක වන විට මළබද්ධය, පාචනය සහ බඩේ වේදනාව වැනි ගැටලු අවම කර ගත හැකිය. සරල ආහාර වෙනස්කම් කිහිපයක් මඟින් බඩවැල් සෞඛ්‍යය වැඩිදියුණු කර ආහාර ජීර්ණය පහසු කර ගත හැකි වේ.

යෝගට්
යෝගට් යනු ලැක්ටික් අම්ල බැක්ටීරියා මඟින් පැසවූ කිරි නිෂ්පාදනයකි. එහි අඩංගු ප්‍රෝබයෝටික් (Probiotic) බැක්ටීරියා බඩවැල් තුළ ඇති හිතකර ක්ෂුද්‍රජීවීන්ගේ වර්ධනයට සහාය දක්වයි. මෙම හිතකර බැක්ටීරියා ආහාර ජීර්ණය පහසු කරන අතර, බඩ පිපුම, මළබද්ධය සහ පාචනය වැනි ගැටලු අවම කිරීමටද උපකාරී වේ. එමෙන්ම කිරිවල අඩංගු ලැක්ටෝස් ජීර්ණය කිරීමටද ප්‍රෝබයෝටික් බැක්ටීරියා උපකාරී වේ. යෝගට් මිලදී ගැනීමේදී "Live and Active Cultures" ලෙස සඳහන් නිෂ්පාදන තෝරා ගැනීම වඩාත් සුදුසුය.

ඇපල්
ඇපල්වල පෙක්ටින් (Pectin) නම් ද්‍රාව්‍ය තන්තු බහුලව අඩංගු වේ. මෙම තන්තු කුඩා බඩවැල තුළ ජීර්ණය නොවී මහ බඩවැල වෙත ගමන් කර එහි හිතකර බැක්ටීරියා සඳහා ආහාරයක් ලෙස ක්‍රියා කරයි. පෙක්ටින් මඟින් මළපහ ප්‍රමාණය වැඩි කරන බැවින් මළබද්ධය සහ පාචනය යන දෙකම පාලනය කිරීමට උපකාරී වේ. එමෙන්ම බඩවැල් ආසාදන සහ දැවිලි තත්ත්වයන් ඇතිවීමේ අවදානමද අඩු කරයි.

චියා ඇට
චියා ඇට තන්තු බහුල ආහාරයකි. ජලය සමඟ මිශ්‍ර වූ විට එය ජෙලි වැනි ස්වභාවයක් ගන්නා අතර, එමඟින් ආහාර ජීර්ණ පද්ධතියට හිතකර පරිසරයක් නිර්මාණය කරයි. චියා ඇට ප්‍රීබයෝටික් (Prebiotic) ලෙස ක්‍රියා කරන අතර, හිතකර බඩවැල් බැක්ටීරියා වර්ධනයට සහාය දක්වයි. එමෙන්ම නිතිපතා මළපහ පිටවීම ප්‍රවර්ධනය කරයි.

පැපොල්
පැපොල් යනු ආහාර ජීර්ණයට ඉතා හිතකර නිවර්තන කලාපීය පලතුරකි. එහි අඩංගු පැපේන් (Papain) නම් එන්සයිමය ප්‍රෝටීන් බිඳ දැමීමට උපකාරී වන අතර, ආහාර ජීර්ණ ක්‍රියාවලිය වේගවත් කරයි. විශේෂයෙන්ම මස් සහ අනෙකුත් ප්‍රෝටීන් බහුල ආහාර ජීර්ණය කිරීමේදී පැපොල් ප්‍රයෝජනවත් වේ.

සම්පූර්ණ ධාන්‍ය

දුඹුරු සහල්, ඕට්ස්, සම්පූර්ණ තිරිඟු පාන් සහ අනෙකුත් සම්පූර්ණ ධාන්‍ය වර්ග තන්තු බහුල ආහාර වේ. මෙම තන්තු මඟින් මළපහට ප්‍රමාණය එකතු කර මළබද්ධය අඩු කරයි. එමෙන්ම ඇතැම් ධාන්‍ය තන්තු හිතකර බඩවැල් බැක්ටීරියා සඳහා ආහාර සැපයීමෙන් ආහාර ජීර්ණ සෞඛ්‍යය වැඩිදියුණු කරයි.

බීට්රූට්

බීට්රූට් කෝප්පයක තන්තු ග්‍රෑම් 3.4ක් පමණ අඩංගු වේ. මෙම තන්තු ජීර්ණය නොවී මහ බඩවැල වෙත ගමන් කර එහි හිතකර බැක්ටීරියා පෝෂණය කරයි.
එමෙන්ම මළපහ ප්‍රමාණය වැඩි කිරීම මඟින් ආහාර ජීර්ණ ක්‍රියාවලිය පහසු කරයි. බීට්රූට් සලාදවලට එක් කර, උඳුනේ පුළුස්සා හෝ ස්මූති ලෙස පානය කළ හැකිය.

ඉඟුරු

ඉඟුරු සියවස් ගණනාවක් පුරා ආසියානු වෛද්‍ය ක්‍රමවල භාවිතා කරන ස්වභාවික ඖෂධයකි. එය ආමාශයේ ඇති ආහාර ඉක්මනින් බඩවැල් වෙත ගමන් කිරීමට උපකාරී වන අතර, ඒ මඟින් අජීර්ණය, බඩ පිපුම, අම්ලය ඉහළ යාම සහ ඔක්කාරය වැනි ගැටලු අවම කරයි. විශේෂයෙන්ම ගර්භණී සමයේ උදෑසන ඇතිවන ඔක්කාරය පාලනය කිරීමට ඉඟුරු ප්‍රයෝජනවත් බව පර්යේෂණ මඟින් ද පෙන්වා දී ඇත.

කොළ පැහැති එළවළු

නිවිති, ගෝවා, මුකුණුවැන්න සහ අනෙකුත් කොළ පැහැති එළවළු දිය නොවන තන්තු (Insoluble Fiber) බහුල ප්‍රභවයන් වේ. මෙම තන්තු මළපහට ප්‍රමාණය එකතු කර එය බඩවැල් තුළින් ඉක්මනින් ගමන් කිරීමට උපකාරී වේ. එමෙන්ම මෙම එළවළුවල අඩංගු මැග්නීසියම් මඟින් බඩවැල් මාංශපේශිවල ක්‍රියාකාරිත්වය වැඩිදියුණු කර මළබද්ධය අඩු කරයි.

msn ඇසුරින්