කෙන්යාවේ ග්‍රාමීය ප්‍රදේශයක කාන්තාවක් සාම්ප්‍රදායික ලෙස ළදරුවන් පිටේ බැඳගෙන යාමට භාවිත කරන රෙදි කැබැල්ලකින් කුඩා එළුවෙකු තම පිටට බැඳගෙන නටන වීඩියෝවක් සමාජ මාධ්‍ය ඔස්සේ වේගයෙන් ව්‍යාප්ත වී තිබේ.

වීඩියෝවේ දැක්වෙන්නේ, මල් රටාවක් සහිත රෙදි කැබැල්ලකින් එළුවා පිටට සුරක්ෂිතව බැඳගත් ඇය, දරුවෙකු සනසන මවකගේ ආකාරයෙන් සෙමින් පැද්දෙමින් සංගීතයට අනුව නර්තනය කරන ආකාරයයි.

මෙම දර්ශනය රූගත කර ඇත්තේ ලී වැටකින් වට වූ, උස තණකොළ සහ වියළීමට දමා ඇති ඇඳුම් පෙනෙන සාම්ප්‍රදායික ග්‍රාමීය නිවසක පරිසරයකය. රෝස පැහැති හිස් ආවරණයක් සහ රටා සහිත ඇඳුම් ඇඳ සිටින ඇය, එළුවා හොඳින් බැඳගෙන විශ්වාසයෙන් යුතුව නටන අයුරු බොහෝ දෙනාගේ සිත් ඇදගෙන තිබේ

වීඩියෝවේ විශේෂත්වය වන්නේ, නර්තනයේ යෙදෙන මුළු කාලය පුරාම එළුවා කිසිදු කලබලයකින් තොරව සන්සුන්ව සිටීමයි. කෙසේ වෙතත්, නර්තනය අතරතුර එළුවාගේ බර සමඟ ඇයට සමබරතාව ගිලිහී යෑමෙන් දණහිස නැමී බිමට වැටුණත්, වැටෙන අවස්ථාවේදී පවා ඇය එළුවා ආරක්ෂිතව පිටේ රඳවා ගැනීමට සමත් වීම බොහෝ දෙනාගේ අවධානය දිනාගෙන ඇත.

මෙම වීඩියෝවේ කිසිදු විස්තර කිරීමක් හෝ පෙළක් නොමැති අතර, එය සම්පූර්ණයෙන්ම ගොඩනැඟී ඇත්තේ ළදරුවෙකුට දක්වන සෙනෙහස සහ සැලකිල්ලම එළුවෙකුටද දක්වන මෙම අපූරු දර්ශනය මතය.

ටික්ටොක් ඇතුළු සමාජ මාධ්‍යවල මෙම වීඩියෝව ඉතා කෙටි කාලයකින් ජනප්‍රිය වූ අතර, "දරුවෙකු හෝ සතෙකු රැකබලා ගැනීමේ මව් සෙනෙහස එක සමානයි" යන අදහසද බොහෝ දෙනා අතර කතාබහට ලක්ව තිබේ.

අශන්ති වරුණසූරිය