බිත්තරයක් කියන්නේ උදේ කෑම මේසයේ නිතර දකින්න ලැබෙන, ලේසියෙන් සකස් කරගන්නත් පුළුවන් පෝෂණයෙන් පිරුණු ආහාරයක්. ඒත් බිත්තරවල කොලෙස්ටරෝල් තියෙනවා කියන කාරණය නිසා ඇතැම් අය බිත්තර කන්න ටිකක් බයයි.

ඇත්තටම බිත්තර කියන්නේ ශරීරයට අවශ්‍ය ප්‍රෝටීන්, විටමින් සහ තවත් වැදගත් පෝෂක රැසක් ලබාගන්න පුළුවන් ආහාරයක්.

බිත්තර කෑමෙන් හෘද සෞඛ්‍යයට, මොළයේ ක්‍රියාකාරිත්වයට සහ අස්ථිවල ශක්තිය පවත්වා ගැනීමට සහායක් ලැබිය හැකි බව පර්යේෂණ කිහිපයකින් පෙන්වා දී තිබෙනවා. ඒ වගේම බර පාලනය කරගන්න උත්සාහ කරන අයටත් බිත්තර හොඳ ආහාර තේරීමක් විය හැකියි.

හෘද සෞඛ්‍යයටත් වැදගත්

2025 වසරේ Nutrients සඟරාවේ පළ වූ අධ්‍යයනයකින් සතියකට බිත්තර එකත් හයත් අතර ප්‍රමාණයක් ආහාරයට ගැනීම සහ හෘද රෝග හේතුවෙන් මිය යාමේ අඩු අවදානමක් අතර සම්බන්ධතාවක් පෙන්වා දී තිබෙනවා. එහෙත් මෙයින් බිත්තර කෑම නිසාම හෘද රෝග අවදානම අඩු වන බව තහවුරු වෙන්නේ නැහැ. සමස්ත ආහාර රටාව සහ ජීවන රටාවත් මෙහිදී වැදගත්.

රුධිර පීඩනය සහ සීනි මට්ටම ගැනත් අවධානයක්

සමහර අධ්‍යයනවලින් බිත්තර මධ්‍යස්ථ ප්‍රමාණවලින් ආහාරයට ගන්නා පුද්ගලයන් අතර දෙවැනි වර්ගයේ දියවැඩියාව සහ අධි රුධිර පීඩනය ඇතිවීමේ අඩු අවදානමක් නිරීක්ෂණය කර තිබෙනවා. නමුත් බිත්තර පමණක් කෑමෙන් මේ රෝග වළක්වාගත හැකි බව එයින් අදහස් වෙන්නේ නැහැ. එළවළු, පලතුරු, මාළු සහ සම්පූර්ණ ධාන්‍ය ඇතුළත් සමබර ආහාර වේලක් පවත්වාගැනීම වඩාත් වැදගත්.

මොළයටත් පෝෂණයක්

බිත්තරවල අඩංගු කොලීන් කියන පෝෂකය මොළයේ සහ ස්නායු පද්ධතියේ සාමාන්‍ය ක්‍රියාකාරිත්වයට වැදගත්. ඒ නිසා බිත්තර සමබර ආහාර වේලකට එක්කර ගැනීමෙන් ශරීරයට මේ පෝෂකය ලබාගන්න පුළුවන්. බිත්තර කෑමෙන් ඇල්සයිමර් වැනි රෝග වළක්වාගත හැකි බවට නම් තවදුරටත් පර්යේෂණ අවශ්‍යයි.

අස්ථි ශක්තිමත්ව තබාගන්නත් උපකාරීයි

අස්ථිවල ශක්තිය පවත්වා ගැනීමට ප්‍රෝටීන් සහ විටමින් D වැදගත්. බිත්තරවල මේ පෝෂක අඩංගු වන අතර, ඒවා ශරීරයේ සාමාන්‍ය ක්‍රියාකාරිත්වයට දායක වෙනවා. නමුත් ශක්තිමත් අස්ථි සඳහා බිත්තර පමණක් ප්‍රමාණවත් නැහැ. කැල්සියම් බහුල ආහාර, ප්‍රමාණවත් විටමින් D සහ නිතිපතා ශාරීරික ක්‍රියාකාරකම් ද අවශ්‍යයි.

ඇස්වල සෞඛ්‍යයටත් ගුණදායකයි

බිත්තරවල ඇති විටමින් A පෙනීම සහ ඇස්වල සාමාන්‍ය ක්‍රියාකාරිත්වය පවත්වා ගැනීමට වැදගත්. ඒ වගේම කහමදයේ අඩංගු ලුටීන් සහ සීඇක්සැන්තින් යන සංයෝග ද ඇස්වල සෞඛ්‍යයට දායක විය හැකියි.

බර අඩු කරගන්න උත්සාහ කරන අයටත් හොඳ තේරීමක්

බර අඩු කරගන්න හිතාගෙන ඉන්නවා නම් බිත්තර ආහාරයට එක්කර ගැනීම ප්‍රයෝජනවත් විය හැකියි. ඒකට හේතුව බිත්තරවල අඩංගු ප්‍රෝටීන් නිසා ආහාරයෙන් පසු වැඩි වේලාවක් බඩ පිරුණු බවක් දැනීමයි. එමඟින් ආහාර වේල් අතර නිතර කුසගින්න ඇතිවීම හෝ අනවශ්‍ය කෙටි ආහාර ගැනීම අඩු කරගැනීමට ඇතැම් අයට හැකි වෙනවා.

විශේෂයෙන්ම උදෑසන ආහාරයට තම්බාගත් බිත්තරයක් සමඟ එළවළු සහ සම්පූර්ණ ධාන්‍ය ආහාරයක් එක්කර ගැනීම හොඳ තේරීමක් විය හැකියි. හැබැයි බිත්තර කෑ පමණින් බර අඩු වෙන්නේ නැහැ. බර පාලනයට දෛනිකව ගන්නා මුළු කැලරි ප්‍රමාණය, ආහාරවල ගුණාත්මකභාවය සහ ශාරීරික ක්‍රියාකාරකම් ද බලපානවා.

බිත්තර කන විට මේ ගැනත් හිතන්න

බිත්තර තම්බා හෝ අඩු තෙල් ප්‍රමාණයකින් පිස ආහාරයට ගැනීම වඩාත් සුදුසු තේරීමක්. අධික තෙල්, බටර්, ලුණු සහ මේදය බහුල සැකසුම් කළ මස් වර්ග සමඟ නිතර ආහාරයට ගැනීමෙන් වළකින්නත් පුළුවන්.

කොලෙස්ටරෝල් මට්ටම ඉහළ අය, හෘද රෝග අවදානමක් ඇති අය හෝ විශේෂ ආහාර උපදෙස් ලබාදී ඇති අය තමන්ට සුදුසු බිත්තර ප්‍රමාණය පිළිබඳව වෛද්‍යවරයකුගෙන් හෝ පෝෂණවේදියකුගෙන් උපදෙස් ලබාගැනීම වැදගත්.

මතක තබාගන්න, බිත්තර කියන්නේ පෝෂණයෙන් පොහොසත් ආහාරයක්. ඒත් හොඳ සෞඛ්‍යයක් සහ නිරෝගී බරක් පවත්වාගන්න නම් එකම ආහාරයක් මත රඳා නොසිට, සමබර ආහාර රටාවක් සහ ක්‍රියාශීලී ජීවන රටාවක් පවත්වාගැනීම තමයි වැදගත්.

අශාන්ති වරුණසූරිය