සිනමා ප්‍රේක්ෂකයින් බහුතරයක් සිනමා පටයකින් බලාපොරොත්තු වෙන්නේ  සරල ව්න්දනයක් . එවැනි නිර්මාණ වලට ඉහළ ප්‍රතිචාර ලැබුණු බව පසුගිය කාලයේ තිරගතවූ සිනමා පට තුලින් පෙනී ගිය කරුණක්.  එවන් සුන්දර සිනමා නිර්මාණයක  වැඩ කටයුතු පසුගියදා  සුබ   මොහොතින් ආරම්භ වූයේ , බත්තරමුල්ල  වොටර්ස්  ඒජ් හෝටල් පරිශ්‍රයේ පිහිටි ඕකීඩ් උත්සව ශාලාවේදීය.  " මළ මගුලයි"  නමින් හැඳින්වෙන මෙය  සම්පූර්ණයෙන්ම හාස්‍යෝත්පාදක සිනමා නිර්මාණයකි.  මීට පෙර " අපේ ප්‍රින්සිපල් "  හා " පාස්පෝට්"  චිත්‍රපට යුගලය තිරයට රැගෙන ආ ක්‍රිස් ඇන්තනිගේ සිව්වන සිනමා නිර්මාණය ලෙසින් මෙය තිරයට එක්වීමට නියමිතව ඇත . ඔහු විසින් අධ්‍යක්ෂණය කරනු ලැබූ " අන්ලොක්"  සිනමා පටය ද නුදුරේම තිරගත වීමට නියමිතයි.  ඒ ටූ ඉසෙඩ් ( A to Z) නමින් හැඳින්වෙන  ව්‍යාපාර ආයතනයක් පවත්වාගෙන යමින් , ඒ තුළින් උපතේ සිට විපත දක්වා සිදුවන ඕනෑම උත්සව අවස්ථාවක්  නිර්මාණාත්මකව සංවිධානය කිරීම මෙම ආයතනයේ අරමුණ හා වගකීමයි.  නමුත් ඒ පිළිබඳව කිසිදු දැනීමක් , අවබෝධයක් හෝ උගත්කමක් නොමැති මෙම පිරිස අදාළ උත්සව අවස්ථාවන් සංවිධානය කිරීමේදී  ඇතිවන විවිධ ගැටලුකාරි තත්වයන් පිළිබඳව මෙතුලින් ප්‍රේක්ෂකයාගේ අවධානයට යොමුකර ඇත. ක්‍රිස් ඇන්තනි,  චාලින් මනුරංග, එල් .දුල්ශාන් සිල්වා එක්ව  ලියූ " මළ මගුලයි" තිර පිටපත කෝසල ගමගේ විසින් නිෂ්පාදනය කර ඇත.  ධර්මප්‍රිය ඩයස් , සම්පත් ජයවීර ,  මිහිර සිරිතිලක , පබෝදා සංදීපනි ,  රිචඩ් මානමුදලි ,   විදුරංග සිරිමාන්න , දයා වයමන්,  රංජිත් රූබන් , රාජා ගනේෂන් , තරිඳු කාවින්ද ගමගේ ඇතුළු පිරිසක් රංගනයෙන් මේ සඳහා   එක්ව ඇති අතර ,  කැමරා අධ්‍යක්ෂණයෙන්  රුවන් කෝස්තා ,  සහය අධ්‍යක්ෂණයෙන්  නිරෝෂන් එදිරිමාන්න ,  සංස්කරණයෙන් ශාන් අල්විස්,   සංගීත අධ්‍යක්‍ෂණයෙන් චින්තක ලක්මාල් ජයකොඩි,  අංග රචනයෙන් ප්‍රියන්ත දිසානායක , කලා අධ්‍යක්ෂණයෙන් මංජුල  අයගම , ඇඳුම් නිර්මාණයෙන් ජීවන්ති පෙරේරා , ප්‍රචාරක නිර්මාණ කටයුතු අංශයෙන් සිනෙත් මාලක පතිරණ ඇතුළු පිරිසක් "මළ මගුලයි "  සඳහා එක්වී ඇත.   මෙම ජනවාරි මාසය ඇතුළත  මෙහි සම්පූර්ණ රූපගත කිරීම් නිම කිරීමට මෙන්ම , නමට ගැළපෙන ලෙසම මෙම  විනෝදාත්මක  " මළ මගුලයි " සිනමා නිර්මාණය  නිම කිරීමට   නළු - නිළි ඇටුළු කණ්ඩායම සූදානමින් සිටී.