මුළුතැන්ගෙයි ඉවතලන පලතුරු ලෙලිවලින් රුව රැකගන්න ඔබත් දන්නවාද?

පලතුරු ආහාරයට ගැනීමෙන් පසු ඒවායේ ලෙලි බොහෝ දෙනකු ඉවත දමනවා. නමුත් ඇතැම් පලතුරු ලෙලිවල සමට ප්‍රයෝජනවත් සංයෝග අඩංගු විය හැකි බව ඔබ දන්නවාද? නිසි සැලකිල්ලෙන් භාවිත කළහොත් ඒවා ඔබේ රූ සත්කාරයටත් එකතු කරගත හැකියි.

නිවසේදීම අත්හදා බැලිය හැකි පලතුරු ලෙලි ආශ්‍රිත රූ සත්කාර කිහිපයක් පිළිබඳවයි මේ.

කෙසෙල් ලෙල්ලෙන් සමට සත්කාරයක්

කෙසෙල් ලෙල්ලේ ප්‍රතිඔක්සිකාරක සහ විවිධ ශාක සංයෝග අඩංගු වේ. එය සමට තෙතමනය ලබාදෙන සත්කාරයක් ලෙස ඇතැම් දෙනා භාවිත කරනවා.

කෙසෙල් ලෙල්ලෙන් මුහුණට සත්කාරයක්

කෙසෙල් ලෙල්ලේ ඇතුළු පැත්තේ ඇති සුදු පැහැති කොටස ස්වල්පයක් ගෙන මී පැණි බිංදු කිහිපයක් සමඟ මිශ්‍ර කරන්න. එය මුහුණේ සුදුසු ස්ථානයක ආලේප කර විනාඩි 10-15ක් පමණ තබා සෝදා හරින්න.

දොඩම් ලෙලිවලින් ෆේස් පැක් එකක්

දොඩම් ලෙල්ලේ විටමින් C සහ ශාකමය ප්‍රතිඔක්සිකාරක සංයෝග අඩංගු වේ. එම නිසා දොඩම් ලෙලි ආශ්‍රිත නිෂ්පාදන සම රැකවරණය සඳහා භාවිත කරනවා.

දොඩම් ලෙලි ෆේස් පැක්

හොඳින් පිරිසුදු කර වියළාගත් දොඩම් ලෙලි කුඩු තේ හැන්දක් ගෙන එයට යෝගට් තේ හැන්දක් එකතු කරන්න. අවශ්‍ය නම් කස්තුරි කහ ස්වල්පයක් ද එක් කළ හැකියි.

මෙම මිශ්‍රණය මුහුණේ ආලේප කර විනාඩි 10-15ක් තබා මද උණුසුම් ජලයෙන් සෝදා හරින්න.

දෙළුම් ලෙලිවලින් සම රැකගනිමු

දෙළුම් ලෙලිවල ප්‍රතිඔක්සිකාරක සංයෝග අඩංගු වේ. සමේ සෞඛ්‍යය රැකගැනීම සඳහා ප්‍රතිඔක්සිකාරකවලට වැදගත් කාර්යභාරයක් තිබෙනවා.

දෙළුම් ලෙලි ටෝනර් එකක්

හොඳින් පිරිසුදු කළ දෙළුම් ලෙලි ස්වල්පයක් වතුරට දමා මද ගින්නේ තම්බාගන්න. නිවුණු පසු පෙරාගෙන ශීතකරණයේ තබන්න.

කෙසේ වෙතත්, ගෙදර සකස් කරන මෙවැනි මිශ්‍රණවල කල්තබා ගැනීමේ ද්‍රව්‍ය නොමැති බැවින් දිගු කාලයක් ගබඩා කර භාවිත කිරීම සුදුසු නැහැ. සමේ ප්‍රතික්‍රියාවක් ඇති වුවහොත් භාවිතය නවත්වන්න.

අලිපේර ලෙල්ලෙන් තෙතමනයට සත්කාරයක්

අලිපේර ලෙල්ලේ ඉතිරි වන මදයේ ස්වභාවික තෙල් අඩංගු විය හැකියි. එය සමේ තෙතමනය රැකගැනීමට උපකාරී විය හැකි නමුත් සංවේදී සමක් ඇති අය විශේෂයෙන් සැලකිලිමත් විය යුතුයි.

අලිපේර ලෙල්ලේ ඉතිරි වී ඇති මදය ස්වල්පයක් ගෙන මුහුණේ කුඩා ස්ථානයක පරීක්ෂා කර බලන්න. ප්‍රතික්‍රියාවක් නොමැති නම් පමණක් භාවිත කරන්න.

කොමඩු ලෙල්ලෙන් සිසිලසක්

කොමඩු ලෙල්ලේ ඇතුළත ඇති සුදු පැහැති කොටසෙහි ජලය අඩංගු වන බැවින් එය සිසිලසක් ලබාදෙන සත්කාරයක් ලෙස භාවිත කළ හැකියි.

එම කොටස හොඳින් පිරිසුදු කර බ්ලෙන්ඩර් කර යුෂ ලබාගන්න. පසුව අයිස් කැට භාජනයකට දමා ශීතකරණයේ තබන්න. භාවිත කරන විට පිරිසුදු රෙදි කැබැල්ලකින් ඔතා මුහුණට මෘදුව තබන්න. අයිස් කැට සෘජුවම සම මත තැබීමෙන් වළකින්න.

 රූ සත්කාරයට පෙර සැලකිලිමත් වන්න

• පලතුරු ලෙලි භාවිතයට පෙර ගලායන පිරිසුදු ජලයෙන් හොඳින් සෝදාගන්න.
• ඕනෑම සත්කාරයක් මුහුණට යෙදීමට පෙර සමේ කුඩා ස්ථානයක පරීක්ෂා කරන්න.
• කැසීම, රතු වීම හෝ දැවිල්ල ඇති වුවහොත් භාවිතය නවත්වන්න.
• තුවාල සහිත හෝ ආසාදිත සම මත මෙම සත්කාර භාවිත නොකරන්න.
• දොඩම් වැනි පැඟිරි පලතුරු ආශ්‍රිත සත්කාරවලින් සමේ කෝපයක් ඇති විය හැකි බැවින් විශේෂයෙන් සැලකිලිමත් වන්න.
• දිනපතා සන්ස්ක්‍රීන් භාවිතය ඇතුළු නිසි සම රැකවරණ ක්‍රම අනුගමනය කරන්න.

සටහන මහේෂානි මීගහපොල

උපදෙස් ආයුර්වේද වෛද්‍ය ඉමාෂා උඩවත්ත