ගර්භනී සමයේදී මව ලබාගන්නා ආහාරය මවගේ සෞඛ්‍යයට පමණක් නොව, ගර්භයේ වැඩෙන දරුවාගේ වර්ධනයටද වැදගත් වේ. විශේෂයෙන් මොළය සහ ස්නායු පද්ධතිය නිසි ලෙස වර්ධනය වීම සඳහා විවිධ විටමින්, ඛනිජ ලවණ, ප්‍රෝටීන් සහ සෞඛ්‍ය සම්පන්න මේද අවශ්‍ය වේ.

ඒ අතරින් මොළයේ හා ස්නායු පද්ධතියේ වර්ධනයට වැදගත් පෝෂක කිහිපයක් පිළිබඳව අවධානය යොමු කරමු.

ඔමේගා-3

සැමන්, සාලයා, තෝරා වැනි තෙල් සහිත මාළු මෙන්ම වෝල්නට් සහ හණ ඇට වැනි ආහාරවල ඔමේගා-3 මේද අම්ල අඩංගු වේ.

ඔමේගා-3 මේද අම්ල මොළයේ සෛල පටල වර්ධනයට සහ දෘෂ්ටි පද්ධතියේ සංවර්ධනයට වැදගත් වේ.

මාළු ආහාරයට ගැනීමේදී ගර්භනී කාන්තාවන්ට සුදුසු මාළු වර්ග සහ ප්‍රමාණය පිළිබඳව වෛද්‍ය උපදෙස් ලබාගැනීම වඩාත් සුදුසුය.

ෆෝලික් ඇසිඩ්

ගර්භනී සමයේදී ඉතා වැදගත් පෝෂකයක් වන ෆෝලික් ඇසිඩ් දරුවාගේ ස්නායු පද්ධතිය නිසි ලෙස වර්ධනය වීමට උපකාරී වේ.

පලා වර්ග, පරිප්පු, බෝංචි වැනි ආහාරවල ෆෝලේට් අඩංගු වේ. ගර්භනීභාවයට පෙර සහ මුල් ගර්භනී සමයේදී වෛද්‍යවරයා නිර්දේශ කරන ෆෝලික් ඇසිඩ් අතිරේකද නිසි පරිදි ලබාගැනීම වැදගත්ය.

 යකඩ

ගොටුකොළ, මුරුංගා කොළ, පියලි වර්ග සහ මස් වැනි ආහාරවලින් යකඩ ලබාගත හැකිය.

යකඩ මවගේ රුධිරයේ ඔක්සිජන් ප්‍රවාහනයට වැදගත් වන අතර, ගර්භයේ වැඩෙන දරුවාට අවශ්‍ය ඔක්සිජන් සැපයීමටද එය වැදගත් වේ.

 කෝලීන්

බිත්තර කහ මදය, රටකජු සහ පියලි වර්ග වැනි ආහාරවල කෝලීන් අඩංගු වේ. දරුවාගේ මොළය සහ ස්නායු පද්ධතියේ වර්ධනය සඳහා කෝලීන් වැදගත් පෝෂකයකි.

අයඩින්

අයඩින් සහිත ලුණු සහ ඇතැම් මුහුදු ආහාර අයඩින් ලබාගත හැකි මූලාශ්‍ර වේ. තයිරොයිඩ් හෝමෝන නිෂ්පාදනයට අයඩින් අවශ්‍ය වන අතර, එම හෝමෝන දරුවාගේ මොළය ඇතුළු සමස්ත වර්ධනයට වැදගත් වේ.

ආහාර පිසීමේදී පෝෂණය රැකගන්නේ කෙසේද?

පෝෂ්‍යදායී ආහාර මිලදී ගැනීම පමණක් ප්‍රමාණවත් නොවේ. ඒවා පිසීමේදීද පෝෂක අධික ලෙස විනාශ නොවන ආකාරයට සකස් කිරීම වැදගත්ය.

පලා වර්ග අධික වේලාවක් තැම්බීම හෝ වැඩි උෂ්ණත්වයකින් පිසීම වෙනුවට කෙටි වේලාවක් පිස ගැනීම වඩා සුදුසුය. සලාදයක් හෝ මැල්ලුමක් ලෙස සුදුසු පලා වර්ග ආහාරයට එකතු කරගත හැකිය.

එළවළු වර්ග වාෂ්පයෙන් තැම්බීමද හොඳ ක්‍රමයකි.

මුං ඇට, කවුපි සහ කඩල වැනි ධාන්‍ය හා පියලි වර්ග පැල කර ආහාරයට ගැනීමෙන් ඇතැම් පෝෂක ශරීරයට උරාගැනීම පහසු විය හැකිය.

මස්, මාළු සහ බිත්තර හොඳින් පිසගෙන ආහාරයට ගැනීම වැදගත්ය. විශේෂයෙන් ගර්භනී සමයේදී අමු හෝ අඩුවෙන් පිසූ ආහාරවලින් වැළකීම සුදුසුය.

ආහාරයට පමණක් සීමා නොවූ ගර්භනී සත්කාර

දරුවාගේ නිරෝගී වර්ධනය සඳහා මවගේ ආහාරය මෙන්ම සමස්ත ජීවන රටාවද වැදගත්ය. කැෆේන් අඩංගු පාන සීමා කර වෛද්‍ය උපදෙස් අනුව සුදුසු ප්‍රමාණයක් පමණක් ලබාගැනීම වැදගත්ය.

මත්පැන් සහ දුම්පානය සම්පූර්ණයෙන්ම වළක්වාගත යුතුය. ප්‍රමාණවත් නින්දක් ලබාගැනීම, මානසික සුවය පවත්වා ගැනීම සහ වෛද්‍ය උපදෙස් අනුව සුවපහසු ඇවිදීම වැනි සුදුසු ව්‍යායාම කිරීමද වැදගත්ය. වෛද්‍යවරයා විසින් නිර්දේශ කර ඇති විටමින් සහ ඛනිජ අතිරේක නිසි පරිදි ලබාගැනීමද අත්‍යවශ්‍යය.

දරුවා සමඟ කතා කරන්න

ගර්භයේ සිටින දරුවා ගර්භනීභාවයේ පසුකාලීන අවධියේදී බාහිර ශබ්දවලට ප්‍රතිචාර දැක්වීමට හැකියාව ලබාගනී. එබැවින් මව දරුවා සමඟ ආදරයෙන් කතා කිරීම, සන්සුන් පරිසරයක් පවත්වා ගැනීම වැනි ක්‍රියාකාරකම් මවටත් දරුවාටත් යහපත් අත්දැකීමක් විය හැකිය. මෘදු සංගීතයට සවන් දීම වැනි ක්‍රියාකාරකම්ද මවගේ මානසික සුවතාවයට උපකාරී විය හැකිය.

අවසානයේ මතක තබාගන්න

දරුවාගේ බුද්ධිය හෝ සහජ හැකියාව තීරණය කරන්නේ එක් ආහාරයක් හෝ එක් පෝෂකයක් පමණක් නොවේ. ජානමය සාධක, මවගේ සෞඛ්‍ය තත්ත්වය, නිසි පෝෂණය, ගර්භනී සත්කාර සහ උපතින් පසු ලැබෙන ආදරය හා උත්තේජනය ඇතුළු කරුණු රැසක් දරුවාගේ වර්ධනයට බලපායි.

එබැවින් ගර්භනී සමයේදී “එක් විශේෂ ආහාරයකින් දරුවාගේ බුද්ධිය වැඩි කළ හැකිය” යන අදහසට වඩා, විවිධ පෝෂක අඩංගු සමබර ආහාර වේලක් සහ නිසි වෛද්‍ය උපදෙස් අනුව සෞඛ්‍ය සම්පන්න ජීවන රටාවක් පවත්වා ගැනීම වඩාත් වැදගත්ය.

සටහන – මහේෂානි මීගහපොල
උපදෙස් – ආයුර්වේද වෛද්‍ය තිළිණි අබේරත්න