නවකයින් අතර දක්ෂයින් අඩුයි Nirosha Thalagala

නර්තන ශිල්පිනියක් ලෙස කලා ක්ෂේත්‍රයට පැමිණි ඇය මේ වනවිට දක්ෂ රංගන ශිල්පිනියක ලෙස ප්‍රේක්‍ෂක ආදරය දිනා  ගනිමින් සිටින්නී ය. ඇය නිරෝෂා තලගල. මේ ඇය සමග අප කළ කෙටි පිළිසඳරකි.

  • මේ දවස්වල වැඩ කටයුතු කොහොමද?

මේ දවස්වල මම දායකත්වය ලබා දෙන මෙගා නාට්‍ය කීපයක් විකාශනය වෙන නිසා කාර්යබහුලයි. ඒ වගේම ප්‍රසංග වේදිකාවත් නැවත යථා තත්ත්වයට පැමිණි නිසා මගේ නර්තන කණ්ඩායම සමගත් කාර්යබහුලයි.

  • රංගනය සහ නර්තනය කොහොමද සමබර කරගන්නේ?

මම වැඩක් බාර දුන්නොත් මගේ නමත් රැකගෙන වැඩ කරගෙන යන හොඳ ගෝලයෝ පිරිසක් මගේ නර්තන කණ්ඩායමේ සිටිනවා. මම ඇතිව හෝ නැතිව නර්තන කණ්ඩායම ඒ විදිහට වැඩ කරගෙන යනවා. සමහර රූගත කිරීම් දවස්වලට යන්න බැරි වෙන අවස්ථා තිබෙනවා.  සමහරවිට රූගත කිරීම් ඉවරවෙලා සහභාගී වන අවස්ථාත් තිබෙනවා. ඉතින් මේ දෙකම සමබරව කරගෙන යෑමේ හැකියාවක් මට තිබෙනවා.

  • ඔබ කැමති රංගනයටද? නර්තනයටද?

නර්තනයට තමයි ජීවිතයේ පළමුවැනි තැන.  නමුත් ටෙලි නාට්‍ය කලාවට මම ගොඩක් ආදරෙයි. ඒ වගේම වේදිකාවත් වෙනස්ම මාධ්‍යයක්. 
මේ මාධ්‍ය තුනම ස්ථාන තුනක පවතින්නේ. අඩු වැඩි නැතිව මාධ්‍ය තුනටම එක වගේ ආදරෙයි.

  • සම්මානයක් නොලැබෙන්නේ ඒ සඳහා අවශ්‍ය චරිත නොලැබෙන නිසාද?

මම චරිත ප්‍රධාන, සෙසු ලෙස වර්ගීකරණය කළේ නෑ. නමුත් මම දායකත්වය ලබා දුන් චරිත සියල්ලක්ම ප්‍රේක්ෂකයින් ආදරයෙන් වැලඳගත් චරිත. 2018 හොඳම සහාය නිළියට හිමි සම්මානය ලබාගන්න මට හැකි වුණා. ඉන් අනතුරුව දෙවතාවක් හොඳම නිළියට සහ සහාය නිළියට හිමි සම්මානවලට නිර්දේශ කර තිබුණා. එහෙත් මේ අවුරුදු දෙක තුනක කාලයක සිට එවැනි නිර්දේශ කිරීමකටවත් ලක් වී තිබුණෙ නැහැ. එයට හේතුව සම්මානයක් ලබා ගැනීමේ ප්‍රමිතියට අයත් චරිත මෑත කාලයේ ලැබුණෙ නෑ. නමුත් දැනට මම දායක වන චරිත ප්‍රේක්ෂකයන්ගේ ආදරයට පාත්‍ර වූ ඒවායි.

  • මවගේ භූමිකාව හරිහැටි ඉටු කරනවා කියලා හිතෙනවද? 

මගේ ජීවිතයේ දුක්ඛිතම ස්ථානය එය. මේ වනවිට ප්‍රේක්ෂකයන් ආදරය කරන මට්ටමේ රංගන ශිල්පිනියක්. නමුත් මට මගේ දරුවා අතපසු වෙනවා. ඒ ගැන හරිම කණගාටුයි. සමහර වෙලාවට හිත හදා ගන්නවා අනෙක් රටවල දරුවන් ගැන හිතලා. මේ කාලයේදී බොහෝ මවුවරුන්ගේ තත්ත්වය මෙයයි. නමුත් දරුවා සමග තනිවෙන සෑම මොහොතකම මගේ උපරිමයෙන් එයාව සතුටින් තබනවා. මම නැති වෙලාවට මට ලොකු සහයෝගයක් ලැබෙනවා පවුලේ අයගෙන්. අපි හැමෝම කැමතියි අපේ දරුවන් සමග කාලය ගත කරන්න. නමුත් දැන් ලංකාවේ තිබෙන තත්ත්වයත් එක්ක එවැනි දේවල් කරන්න බෑ. ඒ නිසා අනෙක් මවුවරුන් වගේම මටත් යම්කිසි වෙලාවකට දරුවාගෙන් ඈත්වෙලා දරුවාගේ දියුණුව සඳහා කටයුතු කරන්න සිදුවෙලා තිබෙනවා.

  • නවක න`ඵ නිළියන් ගැන මොකද හිතෙන්නේ?

නවකයෝ අතර දක්ෂයින් හරිම අඩුයි කියලයි මට හිතෙන්නෙ.  කොපමණ තාක්ෂණය දියුණු වුණත් රංගනයේදී එම නිර්මාණයේ චරිතය ගැන හොඳ අවබෝධයකින් කටයුතු කළ යුතුයි. අද පරම්පරාවේ වැඩි දෙනෙකුට එවැනි අවබෝධයක් නෑ. සමහරවිට ඔවුන් මොනවටද ආවෙ කියලවත් තේරුමක් නෑ. මිනිස්සු සමග ගනුදෙනු කරන විදිහවත් දැනුවත් නෑ. එයාලා එයාලගේ ලෝකවල. අලුත් දේවල් ඉගෙන ගන්නත් කැමති නෑ. 

  • ඉදිරි ඔබේ වැඩකටයුතු කොහොමද?

මගේම  Youtube  නාළිකාවක් ආරම්භ කිරීමට බලාපොරොත්තුවෙන් සිටිනවා. ඒ වගේම මගේ දුව අව්රංගනා නමින් clothing brand එකක් ආරම්භ කරන්න. බලාපොරොත්තුවෙන් සිටිනවා.

ඡායාරූප : රුෂිරු කොළඹතන්ත්‍රිගේ

 

 

හැඩැති ඔබට හරිම ලස්සන Fashions Read Previous

හැඩැති ඔබට හරිම ලස්සන Fashions

හැඩැති ඔබට හරිම ලස්සන Fashions Read Next

හැඩැති ඔබට හරිම ලස්සන Fashions

Realted Post

Leave a comment