පලතුරු ආහාරයට ගැනීමේදී බොහෝ දෙනකුගේ අවධානය යොමු වන්නේ එහි රසවත් මදය වෙතයි. එහෙත් ඇතැම් පලතුරු ලෙලිවල ද ආහාරමය තන්තු, විටමින් සහ ප්‍රතිඔක්සිකාරක සංයෝග අඩංගු වන බව ඔබ දන්නවාද?

නිසි ලෙස පිරිසුදු කර ආහාරයට සුදුසු ආකාරයෙන් සකස් කළහොත් ඇතැම් පලතුරු ලෙලි ද අපේ දෛනික ආහාරයට එකතු කරගත හැකියි.

කෙසෙල් ලෙල්ලේ ආහාරමය තන්තු සහ විවිධ ශාකමය සංයෝග අඩංගු වේ. ආහාරමය තන්තු ආහාර ජීර්ණ පද්ධතියේ සාමාන්‍ය ක්‍රියාකාරිත්වයට වැදගත් වේ. කෙසෙල් ලෙල්ල ආහාරයට එක්කර ගැනීමට අදහස් කරන්නේ නම් හොඳින් සෝදා පිසූ ආකාරයෙන් භාවිත කිරීම සුදුසුයි.

දොඩම් ලෙල්ල

දොඩම් ලෙල්ලේ සුවඳවත් ස්වභාවික තෙල්, ශාකමය ප්‍රතිඔක්සිකාරක සහ තන්තු අඩංගු වේ. හොඳින් සෝදා වියළා කුඩු කරගත් දොඩම් ලෙලි ආහාරවලට සුවඳ සහ රසය එක් කිරීම සඳහා සුළු ප්‍රමාණවලින් භාවිත කළ හැකියි.

 දෙළුම් ලෙල්ල

දෙළුම් ලෙල්ලේ පොලිෆීනෝල් ඇතුළු ප්‍රතිඔක්සිකාරක සංයෝග අඩංගු වේ. මෙම සංයෝග ශාකමය ආහාරවල වැදගත් පෝෂණ ලක්ෂණයක් ලෙස සැලකෙනවා. කෙසේ වෙතත්, දෙළුම් ලෙලි සාරය හෝ කුඩු ඖෂධයක් ලෙස භාවිත කිරීම සඳහා ප්‍රමාණ සහ ආරක්ෂාව පිළිබඳ විද්‍යාත්මක උපදෙස් ලබාගැනීම වැදගත්.

අලිපේර ලෙල්ල

අලිපේර ලෙල්ලේ ද විවිධ ශාකමය සංයෝග අඩංගු වේ. එහෙත් අලිපේර ලෙල්ල සාමාන්‍යයෙන් ආහාරයට ගන්නා කොටසක් නොවේ. එහි අඩංගු සංයෝගවල සෞඛ්‍ය ප්‍රතිලාභ පිළිබඳව තවදුරටත් පර්යේෂණ අවශ්‍යයි.

කොමඩු ලෙල්ල

කොමඩු ලෙල්ලේ ඇතුළත ඇති සුදු පැහැති කොටසෙහි ජලය, ආහාරමය තන්තු සහ සිට්‍රුලීන් වැනි සංයෝග අඩංගු වේ. මෙම කොටස නිසි ලෙස පිරිසුදු කර පිසූ ආහාරවලට එක්කර ගැනීමට හෝ අච්චාරු සකස් කිරීමට යොදාගත හැකියි.

පලතුරු ලෙලි භාවිතයේදී සැලකිලිමත් විය යුතු කරුණු

• - ආහාරයට ගැනීමට පෙර පලතුරු ගලායන පිරිසුදු ජලයෙන් හොඳින් සෝදාගන්න.
• - කුණු වූ, පුස් බැඳුණු හෝ හානි වූ ලෙලි ආහාරයට නොගන්න.
• - සියලුම පලතුරු ලෙලි ආහාරයට සුදුසු නොවන බව මතක තබාගන්න.
• - කෙසෙල්, දොඩම් සහ කොමඩු වැනි පලතුරු ලෙලි භාවිතයේදී නිසි සකස් කිරීමේ ක්‍රම අනුගමනය කරන්න.
• - පලතුරු ලෙලිවලින් සකස් කරන සාර හෝ කුඩු අධික ප්‍රමාණයෙන් ඖෂධයක් ලෙස භාවිත නොකරන්න.

පලතුරු ආහාරයට ගැනීමේදී එහි පෝෂණ ගුණය පිළිබඳව දැනුවත් වීම වැදගත්. එහෙත් සෑම පලතුරු ලෙල්ලක්ම ආහාරයට ගැනීම සුදුසු යැයි සිතීම වැරදියි. නිවැරදි දැනුම, පිරිසුදුකම සහ සුදුසු සකස් කිරීමේ ක්‍රම අනුගමනය කිරීමෙන් ආහාර නාස්තිය අවම කරගැනීමටත් හැකියි.

සටහන - මහේෂානි මීගහපොල

උපදෙස් - ආයුර්වේද වෛද්‍ය ඉමාෂා උඩවත්ත