ජොන්සන් ආසම කෑම

ලෝක ප්‍රකට ජනප්‍රිය තරු අතර සිටින බොහෝ දෙනකුට සුපිරි අවන්හල්වලින් රසවත් ආහාර වේලක් භුක්ති විඳීමටත්, ලොව විවිධ රටවල විශේෂිත ආහාර රස බැලීමටත් අවස්ථාව තිබේ. එහෙත් ඔවුන් ද එදිනෙදා ජීවිතයේදී වැඩි කැමැත්තක් දක්වන සරල ආහාර වර්ග සහ ප්‍රියතම රසයන් රැසක් තිබේ.

පැස්ටා, පීසා වැනි ආහාරවල සිට ජපන් සුෂි දක්වා ඔවුන්ගේ ආහාර රුචිකත්වයන් විවිධාකාරය. එසේ නම් හොලිවුඩයේ ජනප්‍රිය තරු වැඩිපුරම ප්‍රිය කරන ආහාර මොනවාද?

ඩ්වේන් ජොන්සන්

'ද රොක්' (The Rock) යන අන්වර්ථ නාමයෙන් ලොව පුරා ප්‍රසිද්ධියට පත් නළු ඩ්වේන් ජොන්සන්ගේ ප්‍රියතම ආහාර අතර ජපන් සුෂි (Sushi) විශේෂ ස්ථානයක් ගනී.

ඔහු සිය ඉන්ස්ටග්‍රෑම් ගිණුම ඔස්සේ අතිවිශාල සුෂි ආහාර වේල්වල ඡායාරූප සහ වීඩියෝ නිරන්තරයෙන්ම මිලියන සංඛ්‍යාත රසිකයන් සමඟ බෙදා ගනී.

සති ගණනාවක් දැඩි ආහාර පාලන ක්‍රමයක් අනුගමනය කිරීමෙන් පසුව ඔහු විශේෂයෙන්ම රස විඳින ආහාරයක් ලෙස සුෂි හඳුන්වා දී තිබේ. ඇතැම් අවස්ථාවලදී සුෂි කැබලි දුසිම් ගණනක් රස විඳිමින් සිය ආහාර පාලනයෙන් ලැබෙන කෙටි විවේකය සමරන්නට ද ඔහු අමතක නොකරයි.